Alvarlegt einelti getur verið ávísun á sjálfsvíg.

Ég vil tjá mig hérna um umræðuna sem að hefur verið vegna eineltismálsins í Fjölbrautaskóla Suðurlands. Gerendur eineltisins eru ennþá í skólanum og þolandinn þurfti sjálfur að leita sér læknishjálpar.

Ég á son sem að varð fyrir einelti árum saman í grunnskóla  Þeir atburðir sem að áttu sér stað þá, hafa markað líf okkar, mín og sonar míns æ síðan. Það eru 8 síðan að hann losnaði úr þessum skóla.

Þetta einelti var hrottalegt bæði andlegt og líkamlegt. Það var oftar en einu sinni og oftar en tvisvar að hann hugsaði um að fyrirfara sér. Ég þakka Guði fyrir að hafa son minn ennþá hjá mér.

Ég efast um að líf okkar muni nokkurn tímann verða eins og það var. Sonur minn er samt alveg ótrúlega kröftugur, dugmikill og kjarkmikill. Hann er ennþá að hugsa til baka og tala um fortíðina og finnst mér það gott. Maður á nefnilega að ræða málin, það er besta lækningin.

 En nei, hann er ekki alveg tilbúinn að fyrirgefa, held ég. Kannski einhverjir gæfu sig fram og bæðu hann afsökunar? Hann hefði þá valið sjálfur, aldrei þessu vant.

Ég er mjög stolt af hans kjarki og þor, hann fer sínar eigin heilbrigðu leiðir í lífinu. Og hann er svo þrjóskur að ég veit að ef að hann bítur eitthvað i sig þá fer hann ansi langt á þrjóskunni.

En erfiðar stundir geta komið og þá ræðum við þær. Grundvallaratriðið er að tala saman um hlutina.

Ég er móðir hans og því hef ég aldrei talið það eftir mér að berjast fyrir son minn. Sársaukafullt var það engu að síður þegar þáverandi skólastjóri, hrópaði að mér fyrir fyrir um 6 árum síðan í viðurvist sálfræðings sonar míns, að sonur minn hefði aldrei orðið fyrir einelti og það væri ekkert einelti í hans skóla.

Þess vegna vil ég segja við þolendur eineltis og aðstandendur þeirra: Gefist aldrei upp, rétturinn er ykkar!

Athugasemdir

[sigrún (IP-tala skráð) 24.3.2009 kl. 21:57]

Það er leiðinlegt að heyra að sonur þinn hafi orðið fyrir þessu, en ég ætla að vona að sú umræða sem er núna í þjóðfélaginu um þessi mál, opni augu fólks fyrir þessu hræðilega vandamáli.

[Þórkatla Snæbjörnsdóttir (IP-tala skráð) 24.3.2009 kl. 23:07]

Þakka þér kærlega fyrir Sigrún fyrir hlý orð. Fólk verður alltaf að vera á varðbergi í  þessum efnum, þetta er svo lúmskt.