Sakamálasaga taka 3. Rannsóknarlögreglumaður óskast!

Mig vantar pening. Hvað geri ég þá? Ég reyni auðvitað að verða mér út um pening. Sjálfstæðisflokkinn vantaði pening og hvað gerðu þeir þá. Menn þurftu eiginlega ekki að gera neitt. Að sögn Guðlaugs Þórs, hringdi Sigurjón Árnason í Guðlaug til þess að spyrja hvernig hann hefði það á sínu sjúkrabeði? Guðlaugur svaraði að bragði og sagðist ekkert vilja ræða nein styrkjamál, alls ekki styrkinn frá FL- Group.

Nú voru góð ráð dýr, nema hvað að Sigurjón ákveður að jafna stöðuna og gefa Sjálfstæðisflokknum 25 milljónir. Þetta sagði Sigurjón sjálfur í fjölmiðlum, en hvernig fer maður að því að jafna stöðu einhvers sem að maður veit ekki til að hafi gefið nokkurn skapaðan hlut? 

Nema hvað Guðlaugur stígur nú af sjúkrabeði og við tekur langur og strangur tími við það að koma Íslandi endanlega á hausinn. Þegar styrkjamálið afhjúpaðist síðan í fjölmiðlum fyrir stuttu síðan, kannaðist ekki nokkur maður við nokkurn skapaðan hlut. Geir tók á sig glæpinn, en þar sem að almenningur keypti ekki þann boðskap sagði framkvæmdastjórinn af sér en að öðru leyti kannaðist enginn við neitt, alls ekki Kjartan Gunnarsson, Þorgerður Katrín eða Bjarni Ben.

 Síðan hefur atburðarásin verið hröð. Guðlaugur segist hafa beðið tvo góðvini sína að safna pening fyrir Flokkinn, hann væri á hausnum. Ekki gott. Að sögn Guðlaugs, í nýrri útfærslu, brugðust þessi menn afskaplega vel við þessu og drifu í því að lagfæra þetta fjármálavesen flokksins.

 Bjarni Ben. sagði í fyrstu að Kjartan hefði örugglega vitað af styrknum, en daginn eftir sagði Bjarni að það væri ekkert víst að Kjartan hefði vitað af styrknum, hann yrði að svara fyrir það sjálfur. Kjartan Gunnarsson á að hafa varað Geir við að taka við styrknum, en Kjartan vissi ekki af styrknum,... skrítið, hvernig varar maður við einhverju sem að maður veit ekki að er til? 

 Nú segir Sverrir Hermannsson, að Kjartan sé glæponinn, hann hafi alltaf viljað fela fjárhagsstöðu Sjálfstæðisflokksins. Hvers vegna vann Sverrir svona lengi fyrir þennan mann ef að hann vissi upp á hann eitthvað misjafnt? Hvers vegna kemur Sverrir ekki fram fyrr en nú,korteri fyrir kosningar? Kannski er Sverrir kominn með svarið í þessari æsispennandi spennusögu um glæponinn í Dularfulla styrkjamálinu hjá Landsbankanum. Hver veit?

Athugasemdir

[H. Magnússon (IP-tala skráð) 19.4.2009 kl. 17:01]

Það eru mörg, mörg ár síðan Sverrir Hermannsson kom fram í þessum efnum ...