Tilhugalíf og nýr fylginautur?

Þetta er stórpólitísk frétt, þ.e.a.s. ef að úrtak og svarhlutfall hefur verið það stórt að mark sé takandi á. Það kemur ekki fram í fréttinni, maður verður að kaupa Morgunblaðið til að komast að því.  

Borgarahreyfingin er að hala inn atkvæði, á kostnað Sjálfstæðismanna að öllum líkindum. Ekki má gleyma því að aðalstefna hreyfingarinnar er að koma á stjórnlagaþingi og síðan ætla þeir að leggja hreyfinguna niður. Önnur baráttumál sitja á hakanum hjá þessari annars ágætu hreyfingu.

 Enn vantar alvöru svör í tengslum við ESB. Samfylkingin er eini flokkurinn sem að hefur komið með slík afdráttarlaus svör. Það vantar svar frá VG hvernig þeir ætli að starfa áfram með Samfylkingu með óbreytta Evrópustefnu.

Er tilhugalífi Samfylkingar og VG kannski lokið og Samfylkingin farin að daðra við annan möguleika?

O-listi fengi fjóra

Athugasemdir

[Kolla (IP-tala skráð) 21.4.2009 kl. 13:53]

Borgarahreyfingin hefur líst yfir að þeir vilji frystingu eigna útrásarbjánanna (ef ég fengi e-u ráðið mundi ég setja þá sjálfa í frost líka). Samfylkingin sleppur ótrúlega vel með ESB kjaftæðinu. Það verður ekki "aktúellt" næstu árin hér þótt við sæktum um á morgun. Við þurfum leitast við sjálfbærni á heimaslóðum.

[Heimir Örn Hólmarsson (IP-tala skráð) 21.4.2009 kl. 16:33]

Sæl Þórkatla,

Við í Borgarahreyfingunni erum með stutta en mjög snarpa stefnuskrá.

Við leggjum mikla áherslu á stjórnlagaþing (eins og þú segir) og persónukjör. Einnig er mjög áríðandi að vísitala verðtryggingar verði færð aftur til 1. jan 2008. Það þarf að huga að heimilunum sem fyrst. Menn eru að tala um að skapa atvinnu, en okkur finnst að ef þú hefur vinnu og getur ekki borgað af lánum þínum, hvar erum við þá stödd? Viljum við þá bara skapa störf á móti til að vinna c.a. 18 tíma á dag?

Endilega kynntu þér stefnuskrána okkar og ekki vera með fullyrðingar um að við erum einungis með eitt baráttumál. Við erum að gera þetta allt í vinsemd og erum að reyna að berjast fyrir þjóðina.

Ástæðan fyrir því að við erum með þetta ákvæði að leggja niður starfið er sú, að við erum á móti þessari flokka pólitík. Við viljum persónukjör og að helst að menn sitji ekki lengur á þingi en 2 kjörtímabil. Við viljum ekki enda sem einn af þessum flokkum sem við trúum ekki á. Við munum samt sem áður ekki hætta á miðju kjörtímabili.

Varðandi ESB, þá viljum við aðildarviðræður því við vitum ekki hvað er í boði.

Með vinsemd,

Heimir Örn Hólmarsson, 9. sæti RS.