Má ég fá Panodil, ég er með tannpínu?

Núna í mörg ár hafa tannlæknar getað haldið úti frjálsri verðskrá og getað haft þar frítt spil.  Þeir skera sig algerlega úr að þessu leyti til, borið saman við aðra læknisþjónustu og þurfa sem sagt ekkert að fara eftir neinum verðskrám. 

Samningur þeirra við Tryggingarstofnun ríkisins hefur verið opinn í mörg ár og tannlæknar ekki viljað fallast á nýjan samning. Eru tennur ekki hluti af likamanum?

 Hvar í veröldinni yrði þetta liðið nema hjá bananalýðveldum?  Jú nota bene, við erum víst á hraðri þróun til bananalýðveldis en þangað til að við lendum þar endanlega, væri þá ekki þjóðráð fyrir Jóhönnu Sig. að beina augum sínum aðeins að þessu?

Það er jú ekki gott og/eða hollt að þurfa að dæla Panodil í barnið sitt kvöld eftir kvöld, enda af hverju eiga saklaus börn að þurfa að líða fyrir skilningsleysi yfirvalda og peningagræðgi tannlækna?

Sofna ekki án verkjalyfja

Athugasemdir

[Svan (IP-tala skráð) 11.5.2009 kl. 15:18]

"enda af hverju eiga saklaus börn að þurfa að líða fyrir skilningsleysi yfirvalda og peningagræðgi tannlækna?"

...og rangri forgangsröðun foreldra og/eða skort á fræðslu og forvörnum heima fyrir?

[Þórkatla Snæbjörnsdóttir (IP-tala skráð) 11.5.2009 kl. 18:18]

Með þessum orðum þínu hér að ofan: ".....og rangri forgangsröðun foreldra og/eða skort á fræðslu og forvörnum heima fyrir" ert þú að dæma þá foreldra sem að eru á lágum launum eða örorkulífeyrisþegar.

Spurningar til þín Svan: Veistu hver eru lágmarkslaun í þessu landi? Veistu hvað örorkulífeysisþegi fær borgað mikið um hver mánaðarmót? Veistu hvað það kostar mikið að láta gera við 2 tennur hjá tannlækni?

Á foreldri sem sagt að þurfa að velja á milli tannheilsu barnsins eða kvöldmáltíðarinnar fyrir barnið?

[Svan (IP-tala skráð) 11.5.2009 kl. 21:29]

Já ég veit fullvel hver lágmarkslaunin eru hér í þessu landi, hver meðal örorkulífeyrir er játa ég fúslega að ég veit ekki og ég geri mér grein fyrir hver tannlæknakostnaður er hérlendis.Mér finnst bara áhugavert að það skuli ekki einu sinni vera tekið inn í dæmið stærstu tveir þættirnir í tannheilsu manna; mataræðið (lesist: sykurneyslan) og almenn tannhirða.

Ætlunin var ekki að gera lítið úr vandanum, þvert á móti. Í þessari umræðu þá á það alls ekki að vera neitt taboo að við neytum eða neyttum einna mest allra þjóða af sykri og gosdrykkjum (veit ekki hverjar nýustu tölur eru). Spurning um hvort básúna þarf boðskap Thorbjørn Egner yfir fullorðna fólkinu líka?